CFEA - Guísamo

Esta xornada do curso que tivo lugar na Fundación Juana de Vega estivo adicada ó coñecemento teórico dos fundamentos necesarios para realizar a poda en verde correspondente ó período de actividade vexetativa en que se encontran as vides da finca experimental do CFEA, para así, poder complementar a poda de inverno realizada no mes de febreiro.

Foron expostas as distintas actividades a levar a cabo no ciclo vexetativo, dende o desborre ata o posible aclareo de froitos: despampanamentos, deschuponados ou espergurados, pinzamentos, desfollado, clareo dos froitos etc,. sempre tendo en conta a morfoloxía das distintas variedades na diferentes estacións, analizando particularmente as pertencentes a zoa clima atlántico, idade das cepas e tipo de poda practicada. 

Neste día de curso, aínda que estivera programado para xornadas posteriores, observouse o avanzado estado fenolóxico das distintas variedades que existen no campo experimental do CFEA, debido as excepcionais condicións meteorolóxicas de seca e temperaturas elevadas que está a vivir o pais, isto conleva o ter que adiantar moitas das prácticas que se veñen facendo como poden ser comezar a tratar algunhas das cepas contra a excoriose ou ter que comezar xa coa poda en verde.

Observadas estas características excepcionais do cultivo, comezouse co tema a tratar neste día, o da instalación da empalizada. Explicáronse as distintas misións que posúe o sistema de empalizamento, a influencia que ten tanto sobre a fisioloxía da propia vide como sobre a súa produción final e calidade do produto obtido, ademais dos distintos tipos de empalizamento adaptados ás diferentes castes que se están a traballar no campo experimental do CFEA.
Amosouse e explicouse a utilidade dos distintos tipos de materiais empregados para a construción do sistema de espaldeira da finca experimental, comezando polos distintos tipos de postes, arames de formación e vexetación, ancoraxes, tipos de tensores, amarres etc,..Ademais levouse a cabo unha pequena demostración de como se fan as ancoraxes dos postes cabeceiros dunha fila de cepas.

Xa nunha segunda parte máis teórica, os coordenadores do curso fixeron varios supostos para o cálculo do custo que nos suporía unha instalación de empalizada dunha finca de 1 ha de superficie utilizando diferentes tipos de materiais, entre eles están a madeira o ferro galvanizado e o aceiro inoxidable.

Nesta xornada do curso a parte práctica consistiu nos diferentes traballos a realizar no solo para o do cultivo da vide, viuse como se faría unha preparación total do terreo, como se realiza no CFEA so nas liñas e explicáronse outros modelos empregados noutras comunidades ou mesmo noutros cultivos como é o de preparación por puntos.

Víronse os distintos apeiros empregados para a preparación do solo como poden ser a desbouzadora de martelos, despedregadora, fresadora, empregada nas preparacións totais do terreo, comentouse o labor do arado de vertedeira, grade de discos, subsolador, prantadoras de diferentes tipos etc,.

Houbo tempo para explicar como se realiza a enxerta en taller do patrón ca variedade de vide, xunto cos aparellos e materiais que se utilizan para realizala, así como a produción de pranta en diferentes contedores para a conservación varietal así como a reposición de marras.

Nunha segunda parte da xornada, xa na aula, emitiuse o vídeo realizado polo CFEA de “Tipos de Plantación” exposto na Xornada "Técnicas vitivinícolas de interese para as castes Branco Lexítimo e Agudelo na indicación xeográfica "Viños da Terra de Betanzos"  que tivo lugar no Centro o pasado mes de xuño, no cal se expoñen os distintos traballos realizados na plantación do viñedo do Centro, dende a corta das árbores existentes, pasando polos tratamentos de herbicidas a tocóns, desbouzados, preparación das liñas etc,. Todos os pasos emitidos foron explicados polos coordinadores do curso.

Técnicas vitivinícolas de interese para as castes Branco Lexítimo e Agudelo na indicación xeográfica "Viños da Terra de Betanzos"

Explicouse ademais cómo preparar o terreo noutros  supostos que se dan á hora de realizar unha plantación de viñedo, como é a planificación dos camiños de acceso, adaptación da maquinaria o tipo de terreo, orientación, densidades de plantación, distancias entre liñas, etc.

-----

-----